Хиймэл дагуулын мэдээллээр манай орны нийт нутгийн 76-аас дээш хувьд цасан бүрхүүл тогтож, цасан дахь усны нөөц 19,9км куб буюу олон жилийн дунджаас 2-3 дахин их байна.
Улсын хэмжээнд хийгдсэн шар усны үерийн эрсдэлийн үнэлгээгээр 20 аймгийн 315 сумаас 161 суманд эрсдэлийн түвшин дунд болон түүнээс дээш байгаа тул иргэд малчид шар усны үерээс урьдчилан сэргийлж дараах зөвлөмжийг хэрэгжүүлээрэй.
- Үерийн аюултай бүсээс нүүх
- Үер, усны аюулаас урьдчилан сэргийлэх сэрэмжлүүлэг, мэдээ дохиог хэвлэл мэдээллийн хэрэгсэл бусад эх сурвалжаас тогтмол хүлээн авч бусдад дамжуулах
- Тэнгэрийн байдал, үүл салхины чиг, мал амьтны хөдөлгөөн араншныг шинжих уламжлалт аргыг ашиглах
- Гэр, хашаа саравчийг үерийн усны зам, голын голдирол, гуу, жалга, хуурай сайр, ус хальдаг эрэг, татамд барихгүй байх
- Үер усны аюулаас хамгаалах далан, суваг шуудуу, хашлага барих
- Хүүхдийг хараа хяналтгүйгээр гол мөрөн, нуур цөөрмийн орчимд тоглуулахгүй, орхихгүй байх
- Мал амьтны сэг зэм цасны усаар дамжин гол, горхи руу орж ус бохирдуулах, халдварт өвчин тараах эрсдэлтэй тул цаг алдалгүй цэвэрлэгээ, устгал хийж гуу жалга, далан шуудууг чөлөөлөхийг ОБЕГ-аас зөвлөж байна.
