Казах үндэсний баярын “Наурыз 2025” арга хэмжээ энэ сарын 22-ны 09:00 цагт Сүхбаатарын талбайд болно гэдгийг НЗДТГ-аас мэдээллээ.Энэ үеэр соёл, урлагийн тоглолт болохоос гадна казах күрес бөхийн тэмцээн зохион байгуулагдах юм. Түүнчлэн гар урлалын үзэсгэлэн дэлгэгдэж, казах гэр, уран бүтээлийг олон нийтэд танилцуулж, наурызын зоог, уламжлалт идээтэй танилцах боломжтой юм.
Наурызыг 1926 оноос хориглосон гэх боловч 1940-өөд оны эцэс хүртэл Баян-Өлгийд тэмдэглэдэг байлаа. Харин 1990 оны Ардчиллын дараа үндэсний үзэл, ёс заншил сэргэснээр өргөн дэлгэр тэмдэглэх болж, төр засгаас анхаарал хандуулан өндөр ач холбогдол өгөх болжээ. Дэлхий дахинд Ойрхи Дорнод, Балканы хойг, Төв Ази, Кавказ зэрэг газар нутгийн 300 сая гаруй хүн энэхүү баярыг өргөн тэмдэглэн өнгөрүүлдэг байна.
