Санхүүгийн зохицуулах хорооноос “Банк бус санхүүгийн үйл ажиллагааны болон зохистой харьцааны шалгуур үзүүлэлтийг тооцож, хяналт тавих журам”-д нэмэлт, өөрчлөлт оруулахтай холбогдуулж салбарын байгууллагуудын дунд хэлэлцүүлэг өрнүүллээ.
Хэлэлцүүлгийн үеэр журмын нэмэлт, өөрчлөлтийн гол агуулга, зорилтын талаар танилцуулж, оролцогч байгууллагуудтай санал солилцов. Энэхүү нэмэлт, өөрчлөлт нь тогтвортой хөгжлийн зорилтыг хэрэгжүүлэх, жижиг, дунд бизнесийг дэмжих, салбарын урт хугацааны тогтвортой байдлыг хангах зорилготой юм.Тодруулбал банк бус санхүүгийн байгууллагуудын бусдаас татах эх үүсвэрийн зохистой харьцаанд өөрчлөлт оруулах замаар ногоон санхүүжилтийн урсгалыг нэмэгдүүлэх, бизнесийн зээлийн хэмжээг өсгөх, хямд өртөгтэй хөрөнгө оруулалтыг татах боломж бүрдэхээр байна. Энэ нь салбарын хөгжлийг дэмжиж, нийгэм, эдийн засгийн тогтвортой хөгжилд эерэгээр нөлөөлөх ач холбогдолтой юм.
Мөн энэ үеэр Санхүүгийн зохицуулах хорооноос банк бус санхүүгийн салбарт хэрэгжүүлж буй бодлого, арга хэмжээ, салбарын өнөөгийн нөхцөл байдал, тулгамдсан асуудлын талаар мэдээлэл өгч, оролцогчдын саналыг сонслоо.
Монголын банк бус санхүүгийн байгууллагуудын холбоотой хамтран зохион байгуулсан хэлэлцүүлэгт салбарын 100 гаруй байгууллагын төлөөлөл оролцсон юм.
