Санхүүгийн зохицуулах хорооноос “Виртуал хөрөнгийн үйлчилгээ үзүүлэгчийн салбарт тулгамдаж буй асуудал ба шийдэл” хэлэлцүүлгийг зохион байгууллаа. Хэлэлцүүлэгт Монголбанк, Тагнуулын ерөнхий газар, Цагдаагийн ерөнхий газар, Монголын банкны холбоо, арилжааны банкнууд, Монголын биржүүдийн нэгдсэн холбоо болон бүртгэлтэй виртуал хөрөнгийн үйлчилгээ үзүүлэгчдийн төлөөлөл оролцов.
Энэ үеэр виртуал хөрөнгийн үйлчилгээний салбарын өнөөгийн байдал, салбарын тойм мэдээлэл, мөн Мөнгө угаах болон терроризмыг санхүүжүүлэхтэй тэмцэх эрсдэлийн үнэлгээ, ВХҮҮ-дийн баримталж буй бодлого, зарчим, хөгжлийн чиг хандлага, түүнчлэн цахим орчинд үйлдэгдэж буй залилах гэмт хэргийн нөхцөл байдал зэрэг асуудлаар мэдээлэл танилцуулав. Хэлэлцүүлгийн хүрээнд оролцогч байгууллагууд виртуал хөрөнгийн үйлчилгээний салбарт тулгамдаж буй асуудлыг олон талын оролцоотойгоор хэлэлцэж, эрх зүйн орчныг сайжруулах, эрсдэлийг бууруулах, зохицуулалтын байгууллагууд, арилжааны банк болон үйлчилгээ үзүүлэгчдийн хамтын ажиллагааг бэхжүүлэх чиглэлээр цаашид авч хэрэгжүүлэх шаардлагатай арга хэмжээний тухай саналуудыг солилцов.
