Санхүүгийн зохицуулах хорооноос даатгалын компаниудын эрх бүхий албан тушаалтнуудад зориулсан “Компанийн засаглал, комплайнс” сургалт, хэлэлцүүлгийг зохион байгууллаа.
Сургалтын хүрээнд “Компанийн засаглалын кодекс”-ийн хэрэгжилт, “Комплайнсын менежментийн тогтолцоо ISO 37301”, “Нийгмийн хариуцлагын ISO 26000” стандартуудын үндсэн шаардлага, тэдгээрийг практикт нэвтрүүлэх асуудал, даатгалын зах зээлийн өнөөгийн нөхцөл байдал, тулгамдаж буй сорилт, цаашдын чиг хандлагын талаар мэдээлэл өгч, оролцогчидтой санал солилцов.
Комплайнсын тогтолцоог үр дүнтэй хэрэгжүүлэх нь компанийн урт хугацааны тогтвортой хөгжил, санхүүгийн зах зээлийн тогтвортой байдлыг хангах суурь нөхцөл юм. Энэ хүрээнд Санхүүгийн зохицуулах хорооноос санхүүгийн салбарын комплайнсын зохицуулалтын орчныг боловсронгуй болгох, комплайнсын эрсдэлийг үр дүнтэй удирдах, байгууллагын соёлыг төлөвшүүлэх, хэвшүүлэх, мөн Улсын Их Хурлаас баталсан Авлигатай тэмцэх үндэсний хөтөлбөрийн хэрэгжилтийг хангах чиглэлээр бодлого, арга хэмжээг тогтмол хэрэгжүүлж байна.
