Бохир усны “Туул-1” коллекторын шинэ шугамыг ашиглалтад оруулахаар ажиллаж байна. Тус шугам ашиглалтад орсноор 300 мянган өрх ариутгах татуургын төвлөрсөн системд шинээр холбогдоно.
“Туул-1” коллектор нь Гачуурт тосгоноос Төв цэвэрлэх байгууламж хүртэл 32 км урт үргэлжилнэ. Гачуурт, Хужирбулан, Улиастай, Налайх, Амгалан, Шархад, Дамбадаржаа, Долоон буудал, Баянхошуу, Толгойт, Баянголын ам орчмын хорооллуудын бохир усыг шууд болон одоо ажиллаж байгаа Налайх, өмнөд, төвийн болон 23-р коллектороор дамжуулан төв цэвэрлэх байгууламжид хүргэх онцгой ач холбогдолтой. Бүрэн ашиглалтад орсноор төвийн бохирын шугамын ачааллыг 50 хувь бууруулна гэж үзэж байна.
Коллектор барих шийдвэрийг 2007 онд гаргасан ч хэрэгжүүлж чадаагүй өдий хүрсэн бөгөөд УСУГ шугам угсралтын ажлыг өнгөрсөн намраас эхлүүлж улирал харгалзахгүй ажиллаж байна. “Туул-1” бохирын шугам өргөтгөл нь Улаанбаатар хотод ашиглагдаж байгаа шугамуудаас хамгийн өргөн буюу 1.5 метрийн диаметртэй, шугам хоолой нь бохир усанд тэсвэртэй, хөрсний даац авах чадвартай гэдгээрээ онцлог юм.
