Шинэ төв цэвэрлэх байгууламж нь хоногт 250 мянган шоо метр хаягдал ус цэвэрлэх хүчин чадалтай. Тус байгууламж нь бохир усыг механик, физик, хими, нэмэлт биологийн цэвэрлэгээний аргаар технологийн дагуу боловсруулж байна. Төв цэвэрлэх байгууламж 200 хүний бүрэлдэхүүнтэйгээр, дөрвөн ээлжээр 24 цагийн турш ажилладаг. Иргэдийн буруу дадлаас үүдэн бохирдлын хэмжээ нэмэгдэж, Төв цэвэрлэх байгууламжид тоног төхөөрөмжийн эвдрэл, гэмтэл үүсгэх эрсдэлтэй байдгийг инженерүүд анхаарууллаа. Тухайлбал, хоногт дунджаар 190.000-240.000 шоо метр бохир ус хүлээн авч цэвэршүүлдэг. Иргэд усанд уусдаггүй цаас, салфетка зэрэг материалуудыг ялгаж хаяагүйн улмаас хоногт гурван тонн хатуу хог хаягдал гарч байна.
Сонгинохайрхан дүүргийн 20 дугаар хорооны нутагт барьсан тус цэвэрлэх байгууламжийн Техник, эдийн засгийн үндэслэлийг НЗДТГ-ын захиалгаар Францын “Артеллиа вилл энд транспорт” компани боловсруулсан. Харин гүйцэтгэгчээр “Чайна тисижу сивил инженеринг групп”, “Бээжин констракшн инженеринг групп”-ийн хамтарсан консорциум ажилласан байна. 55 барилга, байгууламжаас бүрдэх Төв цэвэрлэх байгууламж гарсан лагаа бүрэн боловсруулж, эрчим хүч үйлдвэрлэн дотоод хэрэглээнийхээ 35 хувийг хангах юм. Мөн хуучин цэвэрлэх байгууламж бохир усыг хүлээж аваад цэвэршүүлэх явцад үнэр ялгарч эргэн тойронд тархдаг байсан бол шинэ цэвэрлэх байгууламж таагүй үнэрийг шийдвэрлэх технологийг нэвтрүүлжээ.
