26 сар хүлээгдсэн Оюу толгойн гүний уурхайн үйлдвэрлэл өчигдөр /2021.01.25/ эхэллээ. Монгол Улсын Ерөнхий сайд Л.Оюун-Эрдэнэ , Рио Тинто группийн Гүйцэтгэх захирал Якоб Стаусхольм нар Оюу толгойн гүний уурхайн анхны тэсэлгээ хийх команд өгснөөр үйлдвэрлэлийн эхний шат албан ёсоор эхэлж буй. Энэ үйл явдал нь нь дэлхийн уул уурхайн зах зээлд эерэг мессеж боллоо.
Нью-Йоркийн хөрөнгийн биржийн өнөөдрийн /2021.01.26/ арилжааны байдлаар Оюу толгойн 66 хувийг эзэмшигч Туркойз Хилл Ресурс (TRQ) компанийн нэгж хувьцаа 16.23 хувь өсөж, 17.5 ам.долларт хүрчээ.
Улмаар Туркойз Хилл Ресурсийн зах зээлийн нийт үнэлгээ 3.54 тэрбум ам.доллар даваад байна. Энэ нь өнгөрсөн оны мөн үетэй харьцуулахад компанийн үнэлгээ 7.69 хувиар өссөн үзүүлэлт юм.
Хөрөнгө оруулагч нарын хэлэлцээ тодорхой үр дүнд хүрч, эерэг ойлголцолд хүрсэн талаарх мэдээлэл өнгөрсөн сард гарснаар сүүлийн нэг сарын хугацаанд тус компанийн хувьцаа 6.6 хувиар өсөөд байсан юм.
Оюу толгойн гүний уурхай 2023 оны нэгдүгээр улирлаас анхны тогтвортой үйлдвэрлэлийн түвшинд хүрч, жилд хагас сая тонн зэс олборлоно. Ингэснээр борлуулалт нь одоогийнхоос 3 дахин нэмэгдэж, Монгол Улс дэлхийн тавд эрэмбэлэгдэх өндөр технологийн гүний уурхайтай болно.
