Монгол Улс, Япон Улсын дипломат харилцаа тогтоосны 50 жилийн ойн өдөр буюу өчигдөр Токио хотын Захирагч Юрико Коикэ Нийслэлийн Засаг дарга бөгөөд Улаанбаатар хотын Захирагч Д.Сумъяабазарт хариу захидал илгээв.
Тус захидалд Токио хотын захирагч хоёр хотын хамтын ажиллагааг өргөжүүлж, харилцан ойлголцлын санамж бичиг байгуулах саналыг дэмжиж буйгаа илэрхийлснийг НЗДТГ-ын Сургалт, судалгаа, олон нийттэй харилцах газар мэдээллээ.
Тэрбээр захидалдаа “Монгол Улс, Япон Улсын хооронд дипломат харилцаа тогтоосны 50 жилийн ойг угтаж захидал илгээсэнд гүнээ талархаж байна. Токио, Улаанбаатар хотууд байгаль орчин, спорт зэрэг олон салбарт хамтын ажиллагаагаа өргөжүүлж ирсэн. Хоёр хотын найрсаг хамтын ажиллагааг шинэ шатанд гаргах зорилгоор харилцан ойлголцлын санамж бичиг байгуулах саналыг дэмжиж буйгаа илэрхийлье. Санамж бичгийг энэ оны эцэс гэхэд байгуулахаар бэлтгэл хангахаа мэдэгдье.
Токио хот цар тахлын дараах сэргэлтийн тогтвортой хөгжлийн бодлогыг чухалчилж байгаа. Иймд хотын удирдлагууд тогтвортой хөгжиж буй хотыг дэмжиж, цар тахлын дараах сэргэлтэд тусалж байгаа. Мөн тогтвортой хөгжиж буй хотуудын сүлжээг байгуулахыг зорьж байна. Улаанбаатар хотыг тус эгнээнд нэгдэнэ гэдэгт итгэлтэй байна” хэмээжээ.
