“Монголын Эдийн засгийн чуулган-2022”-ныг угтсан салбарын хэлэлцүүлэг өнөөдөр “Төрийн бүтээмжийн сэргэлт” сэдвээр үргэлжилж байна. ХЗДХЯ, Цахим хөгжил, харилцаа холбооны яамнаас МҮХАҮТ-д бизнес эрхлэгчдийн төлөөллийг оролцуулан зохион байгуулах дээрх хэлэлцүүлгээр “Төрийн бүтээмжийн сэргэлт: Эрхзүйн шинэтгэл”, “Төрийн өмчит компаниудын засаглалын ил тод байдал”, “Аж ахуйн үйлчилгээний тусгай зөвшөөрөл ба хөрөнгө оруулалтын эрхзүйн орчны шинэчлэл”, “Төрийн бүтээмж ба цахим шилжилт”, “Төр-хувийн хэвшлийн түншлэл” зэрэг сэдвээр илтгэл тавьж бизнес эрхлэгчдийн төлөөллийн хамт хэлэлцэнэ.
Эдийн засгийн чуулганаар “Шинэ сэргэлт”-ийн 6 бодлогыг танилцуулна.
Хэлэлцүүлгүүдээс дэвшүүлэн гарч буй санал, илтгэлийг 4 дүгээр сарын 7-8-нд болох “Монголын Эдийн засгийн форум-2022”-ын чуулганд оруулж улмаар 15 сэдвээр нэгтгэн хэлэлцэнэ хэмээн форумыг зохион байгуулах ажлын хэсгийн дарга, Сангийн сайд Б.Жавхлан мэдэгдэж байна. Тэрээр, “Энэ удаагийн Эдийн засгийн форумаас бид Монгол орны нийгэм, эдийн засгийн хөгжлийг Төр-хувийн хэвшлийн түншлэл, гадаад, дотоодын хөрөнгө оруулагч нарын сонирхолыг илүү ихээр, “Шинэ сэргэлт”-ийн 6 бодлого руу татаж оруулах, илүү дэлгэрэнгүй танилцуулж, ойлгуулах зорилгыг агуулж буй”-г тодотгов.
Засгийн газраас хэрэгжүүлж эхэлж буй “Шинэ сэргэлтийн бодлого”-ын хүрээнд 100 гаруй томоохон төсөл хэрэгжүүлэхээр төлөвлөж, 10 гаруй их наяд төгрөгийн хөрөнгө оруулалт шаардлагатай гэсэн урьдчилсан тооцоо гарчээ.
“Монголын Эдийн засгийн форум-2022”-ын урьдчилсан хэлэлцүүлэг өнөөдөр “Төрийн бүтээмжийн сэргэлт” сэдвээр болж буй бол энэ сарын 24-нд “Аж үйлдвэрийн сэргэлт” сэдвээр УУХҮЯ-нд, 25-нд “Хот, хөдөөгийн сэргэлт”-ээр нийслэл болон бусад яамны оролцоотойгоор, “Боомтын сэргэлт” сэдвээр 28-нд Сангийн яам, ЭЗХЯ-нд, мөн “Ногоон хөгжлийн сэргэлт” сэдэвт хэлэлцүүлгийг БОАЖЯ тус тус зохион байгуулна.
“Монголын Эдийн засгийн форум” дэлхий нийтийг хамарсан цар тахлын улмаас хоёр жил завсарлаад байсан юм.
