ЖАЙКА-ын Монгол дахь төлөөлөгчийн газрын дарга Эрико Тамүра “Монголын эдийн засгийн чуулган”-ы “Хөрөнгө оруулалтын орчин” үндсэн хэлэлцүүлэгт оролцов.
Дэлхийн хоёрдугаар дайны дараа Японы Засгийн газар хамгийн түрүүнд дэд бүтцийн хөрөнгө оруулалтад анхаарал хандуулсан байна. Ингэхдээ хамгийн түрүүнд зүүн далайн эргийн хотуудаа холбосон хурдан галт тэрэг байгуулсан. Үүнийгээ дагуулж аж үйлдвэрийн дөрвөн төв байгуулсан нь Японы эдийн засгийг хурдацтай өсгөх түлхүүр болсныг ЖАЙКА-ын Монгол дахь төлөөлөгчийн газрын дарга Эрико Тамүра хэллээ. Мөн Засгийн газраас хувийн хэвшилтэйгээ маш сайн хамтран ажиллаж чадсан. Яам бүр хөгжлийн төлөвлөгөө гаргадаг бөгөөд ингэхдээ хувийн хэвшлийнхэнээсээ санал авдаг байсан нь Японы хөгжлийн нэг нууц гэдгийг тэрбээр онцлов. Өөрөөр хэлбэл, аливаа бодлого төлөвлөгөө боловсруулахдаа хувийн хэвшилтэйгээ зөвлөлдөх нь туйлын чухал гэдгийг дурдсан юм.
Тэрбээр, “ЖАЙКА-аас Монгол Улсын Засгийн газрын төсвийн хөрөнгө оруулалтын чадавхыг бэхжүүлэх төслийг 2019 оноос хэрэгжүүлж байна. Энэ төсөл төсвийн хөрөнгө оруулалтыг аль болох үндэсний хөгжлийн тэргүүлэх чиглэл болон санхүүгийн чадахвтай нь уялдуулж хийх боломжийг бүрдүүлэх гол зорилготой. Төслийн хүрээнд төсөл боловсруулах, үнэлэх, төсөв батлуулах, хяналт шинжилгээ хийх гэсэн дөрвөн чиглэл ажиллаж байна. Хөрөнгө оруулалтын төслөө сонгохдоо хоёр үндсэн зүйлийг анхаарч үзэх хэрэгтэй. Тодруулбал төслийн хэрэгжих боломж буюу ТЭЗҮ-ийн чанар, бодлогын ач холбогдол, эдийн засгийн өгөөж нь хөгжлийн тэргүүлэх чиглэлтэй нийцсэн байна уу гэдгийг тодорхойлсон удирдамжийг бид гаргаж байгаа. Энэ удирдамжийг бүрэн хэрэгжүүлж чадвал Монгол Улсад хэрэгжүүлэх төслийн чанар сайн болно гэж үзэж байна” гэлээ.
