Нийслэлийн Засаг даргын зөвлөлийн хурлаар нийтийн эдэлбэрийн газрын байршил, хэмжээг тогтоох талаар Нийслэлийн Засаг даргын Барилга, орон сууц, үйлдвэр, технологийн паркийн асуудал хариуцсан орлогч Б.Сүхбаатар танилцуулав.
НИТХ-аас тогтоолоор 2019 онд 32 байршлын 57.66 га, 2020 онд 38 байршлын 130 га газар, 2021 онд 38 байршлын 20.67 га газар буюу нийт 108 байршлын 208.33 га газрыг нийтийн эдэлбэрт бүртгэжээ.
Нийтийн эдэлбэрийн газарт хамааруулж болох байршил, бусдын эзэмшил, ашиглалтад олгоогүй цэцэрлэгт хүрээлэн, ногоон байгууламж бүхий байршлын газар ашиглалтыг судлан, 25 байршлыг тодорхойлсон бөгөөд энэ оны газар зохион байгуулалтын төлөвлөгөөнд тусгасан 17 га газрыг нийтийн эдэлбэрт бүртгэх тухай танилцууллаа.
Тодруулбал, Баянгол дүүрэгт 4 байршилд 0.52 га, Баянзүрх дүүрэгт 6 байршилд 13.95 га, Сонгинохайрхан дүүрэгт 3 байршилд 0.59 га газар байна. Мөн Сүхбаатар дүүрэгт 5 байршилд 0.65 га, Багануур дүүрэгт 5 байршилд 0.84 га, Налайхад 2 байршил бүхий 0.49 га газар байгаа юм. Ингэснээр нийслэлийн нутаг дэвсгэрт олон нийтийн эзэмшлийн амралт, зугаалга, биеийн тамирын зориулалттай газар, цэцэрлэгт хүрээлэн, ногоон байгууламжийг нэмэх, зүй зохистой ашиглах, хамгаалах боломж бүрдэнэ. Нийтийн эдэлбэрт бүртгэснээр тухайн газар хувь хүн, аж ахуйн нэгжийн эзэмшил болдоггүйг Б.Сүхбаатар тодотгов.
Энэ жил 4860 гарааш чөлөөлөхөөс одоогоор 35 байршилд 1025-ыг чөлөөлөөд байна. Нийтийн эдэлбэрт бүртгэх 25 байршлын 16-д тохижилт хийхээр төлөвлөжээ. Үлдсэн 9 байршлыг ногоон байгууламж, тоглоомын талбай хэвээр байлгах аж
