Урин дулааны цаг ирж, газрын хөрс гэсч буйтай холбоотойгоор хүнд даацын тээврийн автомашинууд зам, гүүрийн эвдрэл үүсгэж байна. Үүнтэй холбогдуулан ЗТХЯ, АТҮТ, ТЦА-наас тээврийн жолооч нар, автотээврийн ААН-үүдэд хандан “Тээврийн хэрэгслийн техникийн байдалд тавих ерөнхий шаардлага”-ын дагуу даацаас хэтэрсэн ачаа ачихгүй байх зэрэг стандартыг барьж зорчихыг анхаарууллаа.
Стандартыг хангуулах үүднээс АТҮТ, Зам, тээврийн хөглийн төв, ТЦА хамтран хяналт шалгалт хийн даац хэтрүүлсэн тээврийн хэрэгслийг Зөрчлийн хуулийн дагуу хариуцлага хүлээлгэн буцаах, илүү ачсан ачааг буулгуулж байна. Стандартын шаардлага баримтлаагүйгээс үүдэн тээвэрлэлт саатсан хариуцлагыг тухайн ААН хариуцаж, авто зам, замын байгууламжид үүссэн хохирлыг холбогдох хуулийн дагуу буруутай этгээд барагдуулах болохыг мэдэгдлээ.
Хүнд даацын, ачаа хэтрүүлсэн автомашинууд зам, гүүрийг эвдэж байна.
Даац хэтрүүлсний улмаас үүссэн авто замын эвдрэлийг засварлаж байна.
Цаг агаар дулаарч байгаагаас авто замд ус чийг хуримтлагдаж, авто замын ачаа даах чадвар, бат бэхийн үзүүлэлт огцом буурдаг. Энэ үед том оврын даац хэтрүүлсэн авто машин зорчих нь авто замыг эвдэх, хохирол гарах зэргээр сөргөөр нөлөөлдөг байна. “Автотээврийн хэрэгслийн техникийн байдалд тавих ерөнхий шаардлага” MNS4598:2020 стандартыг (энд дарж харна уу) танилцууллаа.
