Засгийн газраас өгсөн чиглэлийн дагуу компаниуд экспортын орлогоо доллараар авч, Монголбанкинд төвлөрүүлж эхэллээ. Засгийн газар, Монголбанк гадаад валют, тэр дундаа ам.долларын нөөцийг нэмэгдүүлэх цогц арга хэмжээ авч байна. Үүний нэг нь Засгийн газар төрийн оролцоотой компаниудыг гадаад худалдаагаа ам.доллараар хийж, Монголбанкинд ам.доллар төвлөрүүлэх чиглэл өгчээ.
Тус арга хэмжээг хэрэгжүүлэхийг “Эрдэнэс Тавантолгой” ХХК, “Эрдэнэт” үйлдвэр ТӨҮГ, “Оюутолгой” ХХК зэрэгт даалгасан байна.
Энэ дагуу “Эрдэнэс Тавантолгой” ХХК гэхэд өнгөрсөн сард Монголбанкинд 129 сая ам.доллар төвлөрүүлсэн бол энэ дөрөвдүгээр сард 150 сая ам.доллар төвлөрүүлэхээр төлөвлөжээ. Үүн дээр “Оюутолгой” ХХК, “Эрдэнэт” ТӨҮГ нийлээд дөрөвдүгээр сард нэг тэрбум орчим ам.доллар Монголбанкинд төвлөрүүлэх тооцоо гарсан байна.
Богино хугацаанд төв банкинд ам.долларын зузаатгал хийхийн тулд аж ахуй нэгжүүдийн экспортын орлогыг мөн урьдчилж ам.доллараар авах тохиролцоог хийгээд байгаа юм.
