Монгол Улсын иргэн бүрийг эрүүл мэндийн үзлэг, оношилгоонд хамруулах ажил 2022.05.01-ээс орон даяар эхэллээ.
Уг ажлын нээлт өнөөдөр Улсын Хоёрдугаар төв эмнэлэгт болсон юм. Улсын хэмжээнд нэг жил үргэлжлэх энэхүү эрүүл мэндийн үзлэг үндсэн гурван зорилготой юм. Дэлхий нийт КОВИД-19 цар тахалтай хоёр жил гаруй тэмцэж байна. Тиймээс КОВИД-19-ын дараа иргэдийн биед үлдэц, өөрчлөлт байгаа эсэхийг илрүүлэх нь нэн тэргүүний зорилт юм. Хоёрдугаарт, иргэн бүр урьдчилан сэргийлэх үзлэгт тогтмол хамрагддаг болгож хэвшүүлэх, гуравдугаарт, Монгол Улсын хүн ам дунд зонхилон тохиож буй таван өвчнийг бууруулах зорилготой гэдгийг Эрүүл мэндийн сайд С.Энхболд нээлтийн үеэр онцлов.
Эрүүл мэндийн үзлэгийг хот, суурин газруудын эмнэлгээр, алслагдсан сумдад явуулын амбулаториор хийх аж.
Монгол Улсын хүн амын өвчлөлийн тэргүүлэх шалтгаанд хоол боловсруулах эрхтэн тогтолцооны өвчин, амьсгалын тогтолцооны өвчин, зүрх судасны тогтолцооны өвчин, шээс бэлгийн тогтолцооны эмгэг, гэмтэл, хордлого ордог байна. Харин нас баралтын тэргүүлэх шалтгаанд зүрх судасны тогтолцооны өвчин, хавдар, гэмтэл, хордлого болон гадны шалтгаант бусад тодорхой эмгэг, хоол боловсруулах тогтолцооны өвчин, амьсгалын тогтолцооны өвчин зонхилж байна.
