Улаанбаатар хотод тээврийн хэрэгслийг улсын дугаарын тэгш, сондгойгоор хөдөлгөөнд оролцуулах зохицуулалтыг цаашид үргэлжлүүлэх эсэх талаар иргэдээс санал авч байна.
Та саналаа энэ холбоосоор орж, https://vote.ulaanbaatar.mn/home өгөх боломжтой.
Нийслэлийн Засаг даргын захирамжаар 8 дугаар сарын 27-ноос энэ сарын 3-нд Улаанбаатар хотод тээврийн хэрэгслийг улсын дугаарын тэгш, сондгойгоор хөдөлгөөнд оролцуулсан. Тодорхой бүсэд дугаарын хязгаарлалт үйлчилсэн 8 хоногт судалгаа хийж, мэргэжлийн байгууллагууд үнэлгээ, дүгнэлт өгчээ. Авто машиныг улсын дугаарын тэгш, сондгойгоор хөдөлгөөнд оролцуулах үед өдөрт 237-283 мянган тээврийн хэрэгсэл хөдөлгөөнд оролцож, хөдөлгөөний эрчим 30 гаруй хувиар багассан аж.
Өнгөрсөн оны 9 дүгээр сарын 1-нд хөдөлгөөнд оролцож буй тээврийн хэрэгслийн хурд 7-9 км/ц байсан бол энэ жил 15-20 км/ц байлаа. Дугаарын хязгаарлалтад багтсан замын нийт урт 1350 км. Машиныг тоог давхцуулахгүй тооцоход Улаанбаатар хотод одоогоор 642,315 тээврийн хэрэгсэл бүртгэлтэй байна. Энэ нь 2011-2012 онд зорчиж байсан автомашины тоо даруй 50 хувиар нэмэгдсэн гэсэн үг. Харин өнгөрсөн оныхоос 5 хувиар нэмэгджээ. Улсын хэмжээнд 1,122,644 автомашин байгаагийн 57 хувь буюу 642,315 нь нийслэлд бүртгэлтэй. Гэтэл оношилгоонд орж буй машины тоо 351,038 буюу бүртгэлтэй машины 55 хувь. Улсын хэмжээнд ч оношилгооны хувь 52-оос хэтрэхгүй байгаа аж.
