Монгол Улсын Соёлын элч Морин хуурын чуулга Япон улсад айлчлан тоглоод өчигдөр эх орондоо ирлээ. Наран улсын үзэгчдэд уран бүтээлээ хүргэхээр арваннэгдүгээр сарын 28-ны өдөр тус улсыг зорьсон юм. Тэдний анхны тоглолт Монгол-Япон Улс хооронд дипломат харилцаа тогтоосны түүхт 50 жилийн ойн хүндэтгэлд зориулан Япон Улсын Токио хотын “NHK Hall”-д болсон тоглолт юм. Энэхүү тоглолтод Монгол Улсын Ерөнхийлөгч У.Хүрэлсүх тэргүүн хатагтай Л.Болорцэцэг, Япон Улсын Цог жавхлант Эзэн хаан Нарүхито, Эрхэм дээд хатан Насако нар болон хоёр улсын сайд төлөөлөгчид гээд олон хүндэтгэлтэй хүмүүс уригдан ирсэн түүхэн тоглолт болсон юм.
Түүнээс хойш Япон Улсын Осака, Накацү, Мачида, Накано, Нара мужийн Каваками, Хоофү зэрэг 13 хотуудад айлчлан тоглолтоо амжилттайгаар зохион байгуулсан юм.
Тоглолтын бүрэлдэхүүнд Улсын филармонийн Морин хуурын чуулга, удирдаач Д.Түвшинсайхан, гоцлол дуучин, гавьяат жүжигчин Б.Мөнхбаатар, УДБЭТ-ын гоцлол дуучин Б.Энхнаран, Б.Монголхүү нар багтжээ.
Морин хуурын чуулгын Япон Улс дахь айлчлан тоглолтын санаачлагч, ерөнхий зохион байгуулагч нь Монгол Улсын Соёлын элч Сато Нарито юм.
