Монголбанкны Эрдэнэсийн сангаас XVII жарны “Үзэсгэлэн болгогч” хэмээгч усан туулай жилийг угтан “Туулай жил”-ийн дурсгалын мөнгөн зоосыг худалдаанд гаргаад удаагүй байна.
Эрдэнэсийн сангаас 12 жилийн дурсгалын зоосны цувралыг 2020 онд “Хулгана жил” дурсгалын мөнгөн зоосоор эхлүүлж, 2021 онд “Үхэр жил”, 2022 онд “Бар жил” дурсгалын мөнгөн зоосыг худалдаанд гаргаж байв. “Туулай жил”-ийн зоос 12 жилийн дөрөв дэх нь болж гараад байна.
Цаашид цувралаар гарах эдгээр дурсгалын зоосыг Монголын уламжлалт зурхайд дүрсэлснээр хүмүүн биетэй, 12 жилийн тэргүүнтэй, махбодын өнгө зүстэй, мутартаа 12 жилийн бэлэг тэмдгийг барьсан, уламжлалт зургийн аргаар зурж бүтээж буйгаар онцлог аж. Дурсгалын зоосыг орчин үеийн Smartminting технологиор урлаж байна.
“Туулай жил”-ийн дурсгалын зоос нь 1 унцын 999 сорьцтой цагаан мөнгөөр үйлдвэрлэсэн, 38.61 мм хэмжээтэй, 10 мянган төгрөгийн нэрлэсэн үнэтэй, 31.1 гр жинтэй юм. Алтан зоос нь 0.5 гр жинтэй, диаметр 11 мм, 200 мянган төгрөгийн үнэтэй худалдаанд гарч байгаа юм. Сүүлийн үед техник, технологийн хөгжилтэй зэрэгцэн дурсгалын зоосыг хэлбэр хийцийн хувьд олон төрлөөр үйлдвэрлэх болсны нэг нь ялтсан мөнгөн дэвсгэрт юм. “Туулай жил”-ийн зоосыг мөн энэ технологиор гаргажээ.
