Сангийн сайд Б.Жавхлан болон холбогдох албаны төлөөлөгчид хоёрдугаар сарын 27, 28-ны өдрүүдэд Филиппин Улсын Манила хотод Азийн хөгжлийн банк (АХБ)-нд албан айлчлал хийж, АХБ-ны ерөнхийлөгч Масацүгү Асакава, дэд ерөнхийлөгч Ахмед Саеид болон холбогдох газрын захирлуудтай уулзлаа.
Энэ үеэр Сангийн сайд Монгол Улсын 2022 оны төсөв, санхүүгийн гүйцэтгэл, тэр дундаа эдийн засаг, төсөвт гарсан эерэг өөрчлөлтүүд болон дунд хугацаанд хэрэгжүүлэх төсөв, санхүүгийн реформуудын талаар АХБ-ны удирдлагуудад танилцуулсан юм. Мөн 2023 оны макро эдийн засгийн төлөв, энэ онд амжилттай хэрэгжүүлсэн гадаад бондын өрийн зохицуулалт /Сенчири-2/ болон өрийн менежментийн талаар мэдээлэл өгч, АХБ-тай хамтран хэрэгжүүлж буй 2021-2024 оны стратегийн хэрэгжилтийн талаар санал солилцлоо.
Цаашид шинээр боловсруулах дараагийн дөрвөн жилийн хамтын ажиллагааны стратегийн хүрээнд “Шинэ сэргэлтийн бодлого”-ыг хэрэгжүүлэхэд хамтран ажиллах, тэр дундаа төр, хувийн хэвшлийн түншлэлийг бэхжүүлж, энэ чиглэлээр төсөл, арга хэмжээний тоог нэмэгдүүлэн АХБ-ны хувийн хэвшилд олгох санхүүжилтийн хэмжээг тэлэх замаар хамтын ажиллагааг өргөжүүлэх боломжуудын талаар хоёр тал зөвшилцлөө.
АХБ-ны удирдлагууд болон ажлын хэсгүүд ойрын хугацаанд Монгол Улсад ажлын айлчлалуудыг хийж, уулзалтын үеэр яригдсан асуудлуудаар судалгааны ажлуудыг эхлүүлэхээр болсон юм.
