Үнэт цаасны арилжаагаар энэ оны эхний 3 сард 74.1 тэрбум төгрөгийн гүйлгээ хийж, 258.2 сая ширхэг үнэт цаас арилжсан нь өмнөх оны мөн үеийнхээс гүйлгээ 21.3 (22.3 хувь) тэрбум төгрөгөөр буурч, арилжсан үнэт цаас 161.9 (2.7 дахин) сая ширхгээр өсжээ.
Үнэт цаасны гүйлгээ 2023 оны 3 дугаар сард 19 тэрбум төгрөг болж, өмнөх сарынхаас 2.4 (14.4 хувь) тэрбум, өмнөх оны мөн үеийнхээс 5.2 (37.2 хувь) тэрбум төгрөгөөр өсжээ. Арилжсан үнэт цаас 68.6 сая ширхэг болж, өмнөх сарынхаас 40.6 (2.4 дахин) сая, өмнөх оны мөн үеийнхээс 48.4 (3.4 дахин) сая ширхгээр өссөн байна. Хөрөнгийн зах зээлийн чиг хандлагыг илэрхийлэх ТОП-20 дундаж индекс энэ оны 3 дугаар сард 38538.8 нэгж болж, өмнөх сарынхаас 197.9, өмнөх оны мөн үеийнхээс 515.4 нэгжээр өссөнийг Үндэсний статистикийн хорооноос гаргадаг нийгэм, эдийн засгийн мэдээлэлд тэмдэглэжээ.
Хөрөнгийн зах зээлд үйл ажиллагаа явуулж буй хувьцаат компаниудын үнэт цаасны зах зээлийн нийт үнэлгээ энэ оны 3 дугаар сард 6.5 их наяд төгрөг болж, өмнөх сарынхаас 461.9 (6.6 хувь) тэрбум төгрөгөөр буурч, өмнөх оны мөн үеийнхээс 1.2 (21.4 хувь) их наяд төгрөгөөр өсжээ.
