Засгийн газар хөрөнгө оруулалт татах, хамгаалах механизм бүрдүүлж, гадаадын шууд хөрөнгө оруулалтыг 2024 онд 4 тэрбум ам.долларт хүргэхийг зорьж байна.
Монгол Улсын хөгжлийн 2024 оны төлөвлөгөөний бодлогын тэргүүлэх чиглэл болох “Хөрөнгө оруулалтыг нэмэгдүүлэх” хүрээнд Монгол Улс нь Япон Улстай Эдийн засгийн түншлэлийн хэлэлцээрийг 2016 онд байгуулсан. Ирэх онд БНСУ-тай Эдийн засгийн түншлэлийн хэлэлцээр, БНХАУ-тай Чөлөөт худалдааны хэлэлцээр, түүнчлэн Хөрөнгө оруулалтыг хөхиүлэн дэмжих, харилцан хамгаалах хэлэлцээрийг 3 улстай шинэчлэн байгуулах юм. Түүнчлэн, орчин үеийн дэвшилтэт технологи ашиглан агаарын геофизикийн хайгуулын цогц судалгааг эхлүүлж, хамрагдсан талбайг 20 хувьд хүргэн, уул уурхайн салбар дахь хөрөнгө оруулалтыг нэмэгдүүлэхээр төлөвлөжээ.
Гадаадын шууд хөрөнгө оруулалт 2022 оны байдлаар 2.5 тэрбум ам.доллар болжээ. Өнгөрсөн онд эрчим хүчний 20.7 хувийг импортоор хангаж байв. Иймд, эрчим хүчний салбарыг эдийн засгийн үр ашигтай болгон, дотоодын хэрэгцээг бүрэн хангаж, экспортлох суурь нөхцөл бүрдүүлэх, чөлөөт бүсүүдийг эдийн засгийн эргэлтэд оруулж, хөрөнгө оруулалт татах нь чухал байгааг ЭЗХЯ мэдээлэв.
