Прокурорын байгууллага энэ оны 7 дугаар сарын 3-7-нд хэрэг бүртгэлтийн 29.548, мөрдөн байцаалтын 1734 хэргийг хянан ажиллав. Үүнээс:
- эрүүл мэндийн халдашгүй байдлын эсрэг 123,
- өмчлөх эрхийн эсрэг 82,
- бэлгийн эрх чөлөө халдашгүй байдлын эсрэг 15,
- авлига, албан тушаалын 5,
- хүний амьд явахын эсрэг 5,
- хүүхдийн эсрэг 4,
- мансууруулах эм, сэтгэцэд нөлөөт бодисыг хууль бусаар ашиглах 2,
- нийт 269 хэрэгт яллах дүгнэлт үйлдэн шүүхэд шилжүүлж шийдвэрлэв.
Яллах дүгнэлт үйлдэн шүүхэд шилжүүлсэн зарим хэргээс дурдвал:
- Нийслэлийн прокурорын газраас иргэн Б.Т нь Хан-Уул дүүргийн нутаг дэвсгэрт химийн хорт болон аюултай бодисын ангилалд орсон 500 кг натрийн сульфидыг хууль бусаар ашиглан үйл ажиллагаа явуулж, хадгалсан гэх хэрэгт Эрүүгийн хуулийн 24.3 дугаар зүйлийн 1, 3-т зааснаар яллах дүгнэлт үйлдэн Хан-Уул дүүргийн эрүүгийн хэргийн анхан шатны шүүхэд;
- Сэлэнгэ аймгийн Мандал сум дахь Сум дундын прокурорын газраас тус сумын Нийгмийн даатгалын тасгийн дарга Ж.Э нь албан үүргээ зохих ёсоор биелүүлээгүй, нягтлан бодогч Д.Э нь эрх мэдэл, албан тушаалын байдлаа урвуулан ашиглаж, өөртөө давуу байдал бий болгосон гэх хэрэгт Эрүүгийн хуулийн 22.1 дүгээр зүйлийн 2 /Эрх мэдэл, албан тушаалын байдлаа урвуулан ашиглах/, 23.5 дугаар зүйлийн 1 /Хайнга хандах/-т зааснаар яллах дүгнэлт үйлдэн тус сум дахь Сум дундын шүүхэд;
- Говь-Алтай аймгийн прокурорын газраас тус аймгийн Зоонозын өвчин судлалын салбар төвийн даргын албан үүргийг түр орлон гүйцэтгэгч Р.Н, Мэргэжлийн хяналтын газрын Байгаль орчны хяналтын улсын байцаагч Г.Б нар нь эрх мэдэл, албан тушаалын байдлаа урвуулан ашиглаж, зөрчил шалган шийдвэрлэх ажиллагааны явцад хураагдсан 10 ширхэг Монгол тарвагыг устгалд оруулсан гэж баримт бичгийг хуурамчаар үйлдсэн. Мөн хураан авсан эд хөрөнгийг завшсан гэх хэрэгт Эрүүгийн хуульд зааснаар яллах дүгнэлт үйлдэн тус аймаг дахь Сум дундын эрүүгийн хэргийн анхан шатны шүүхэд тус тус шилжүүлээд байна.
