Нийслэл хотод автозамын ээлжит шинэчлэл, урсгал засвар үргэлжилж байна. Чингисийн өргөн чөлөө буюу Төв шуудангийн уулзвараас Энхтайваны гүүр хүртэлх авто замын хөдөлгөөнийг өнөөдрөөс хязгаарлаж, засварын ажил гүйцэтгэх гэж байна.
Тус ажлыг долоодугаар сарын 22-24-ний хооронд гүйцэтгэхээр төлөвлөж байсан ч бороо орсон тул өнөөдөр буюу долоодугаар сарын 26-ны 22.00 цагаас 28-ны 06.00 цаг хүртэл уг авто замыг хааж, асфальт бетон хучилт хийх юм. Иймд жолооч нарыг бусад замыг сонгон хөдөлгөөнд оролцохыг ТЦА-наас анхаарууллаа.
Мөн өнгөрсөн амралтын өдрүүдэд үргэлжилсэн үер, усны нөхцөл байдлаас үүдэн Баянгол дүүргийн нутаг дэвсгэрт Чингүнжавын гудамжны авто зам эвдэрсэн. Уг эвдрэлээс үүссэн хог хаягдлыг өнгөрсөн өдрүүдэд цэвэрлэж, яаралтай нөхөн сэргээх үүргийг нийслэлийн Засаг дарга өгөөд байна.
