МУИС-ийн Монгол судлалын хүрээлэнгээс эрхлэн гаргадаг “МУИС-ийн профессорын эрдмийн өв” цувралын 27 дахь дугаар уншигчдын хүртээл боллоо.
Энэ удаагийн дугаарт Монгол Улсын СГЗ Долгорын Цэнджавын судалгаа шинжилгээний гурван боть бүтээл гарч байгаа юм. Эхний хоёр боть нь өгүүллийн түүвэр, гуравдугаар боть нь зохиолчийн урлаг судлал гэх цоо шинэ бүтээл уншигчдын гарт хүрч байна. Эдгээр боть ном нь утга зохиол сонирхогч болон багш, оюутнуудад нарт гарын авлага болох юм.
Монгол Улсын тэргүүлэх их сургууль МУИС-ийн эрдэмтэн профессор багш нарын эрдмийн өвийг баринтаглан түгээх зорилгоор Монгол судлалын хүрээлэнгээс “МУИС-ийн профессорын эрдмийн өв” цуврал бүтээлийг 2017 оноос эхлэн эрхлэн гаргаж байгаа юм.
Энэхүү номын нээлтэд Монгол Улсын нэр хүндтэй доктор профессор, зохиолч, яруу найрагчид хүрэлцэн ирж санал бодлоо хуваалцлаа.
СГЗ До.Цэнджав хэлэхдээ, “Энэхүү цуврал бол оюуны хөрөнгө оруулалтын маш том жишээ юм. Энэ удаад миний “Утга зохиолын боловсрол”, “Утга зохиолын судлал шүүмж”, “Зохиолчийн урлан судлал” гэсэн гурван боть хэвлэгдэн гарч байна. Одоогоор би 12 боть ном гаргаад байна. Уран зохиолын бүх төрлөөр бичсэн. Утга зохиолоос нэг өдөр ч хөндийрч үзсэнгүй, 50 гаруй жил найзаллаа. Энэхүү гурван боть номоо зохиолч болохыг мөрөөддөг, утга зохиол сонирхдог, мэргэшиж байгаа, бүх сургуулийн багш нарт зориуллаа. “Зохиолчийн урлал судлал” боть ном шинээр гарсан. Зохиолчийн урлал судлал, лаборатори гэж их ярьдаг ч чухам юу вэ гэх асуултад хариулах даацтай бүтээл гараагүй. Эдгээр ботиос хамгийн шинэлэг нь Зохиолчийн урлал судлал буюу зохиолын лаборатори гэх ном юм” хэмээв.
