Төрийн үйлчилгээний E-Mongolia-д Foreign цонхыг нээж, гадаадын иргэдэд F-register-ийн тусламжтайгаар шаардагдах үйлчилгээ авах боломжтой болголоо.
Албаны болон хувийн зорилгоор Монголд оршин сууж буй гадаадын иргэд, жуулчид F-Register /бүртгэл/ ашиглан E-Mongolia-гаар үйлчлүүлнэ. F-Register гэдэг нь Монголд амьдран суугаа болон аялан жуулчилж буй иргэд улсынхаа код, төрсөн огноо, хүйс зэргээс бүрдсэн бүртгэлийн дугаар юм. Foreign цонхны онцлох хэсэг дэх бүх төрлийн виз мэдүүлэх, сунгах зэрэг мэдээлэл immigration.gov.mn-д линк хэлбэрээр шууд шилжих боломжтойгоор шийджээ.
ЦХХХЯ, ГИХГ, Хил хамгаалах ерөнхий газар, “И-Монгол академи” гадаадын иргэд Монголд хөрөнгө оруулж, бизнес эрхлэх, аялан жуулчлахыг дэмжих, өөрөөр хэлбэл шинэ ажлын байр, цалин, татвар, төсвийн орлого нэмэхэд хөшүүрэг болох технологийн шийдлүүдийг боловсруулж байна.
Гадаадын иргэн Монгол Улсын хилээр нэвтэрснээс хойш 24 цагийн дараа бүртгэлд үндэслэн 13 оронтой регистрийн дугаар (F регистр) олгох бөгөөд гадаад паспортын зургаа support@immigration.gov.mn хаягаар илгээж, богино хугацаанд авах боломжтой. Зааврын дагуу төрийн үйлчилгээний нэгдсэн систем E-Mongolia аппликейшнээс F регистрийн дугаар авах үйлчилгээг ашиглах боломжтой. Гадаадын иргэн мэдээллээ үнэн зөв бөглөсөн бол орон зайн саадгүйгээр 13 оронтой F бүртгэлийн дугаараа шууд хүлээн авахыг ЦХХХЯ мэдээллээ.
