УИХ өнгөрсөн долоо хоногт Шүүхийн Ерөнхий зөвлөлийн шүүгч бус гишүүнд нэр дэвшигчдийн томилгоог хэлэлцэхэд таван нэр дэвшигчийн нэг нь бүдэрсэн. Тодруулбал, ШЕЗ-ийн шүүгч бус гишүүнд Н.Отгончимэг, Н.Баасанжав, Р.Онончимэг, Н.Мөнгөнцэцэг нарыг томилохыг дэмжсэн бол Д.Эрдэнэчимэгийг томилохыг дэмжээгүй юм. Тиймээс дэмжигдээгүй гишүүний оронд Д.Зүмбэрэллхамыг оруулж ирлээ. Өчигдөр УИХ-ын хууль зүйн байнгын хорооны хурлаар Д.Зүмбэрэллхамыг дэмжиж өнөөдөр УИХ-ын чуулганаар “ ногоон гэрэл”-ээр дэмжигдэв. Гэтэл Д.Зүмбэрэллхам нь томилгооны журманд нийцээгүй аж. ШЕЗ-ийн шүүгч бус гишүүнийг томилох журманд өмнө нь энэ байгууллагад ажиллаж байгаагүй хүнийг томилно гэж заасан атал Д.Зүмбэрэллхам нь ШЕЗ-д ажиллаж байжээ.
Энэ томилгоог эсэргүүцэж УИХ-ын гишүүн Н.Алтанхуяг үг хэллээ. Тэрбээр , “ Шүүхийн шинэчлэлийг ингэж хулгай болгохоо, Ардын намынхын боль. Өндөр оноо авч орж ирсэн Д.Эрдэнэчимэг гэх эмэгтэйг та нар зориуд унагаж оронд нь өөрийн хүнээ оруулж ирж байгаа юм байна. Д.Зүмбэрэллхам томилгоонд нийцэхгүй байхад, хүчээр зүтгүүлж хуулийг хулгай болгож байгааг дэмжихгүй байна” гэв. Хариуд нь УИХ-ын гишүүн Ц.Мөнх-Оргил чуулганы танхимд микрофонгүйгээр ихэд бухимдан тайлбар хийв.
Шүүхийн шинэчлэл гэж манлайлж явсан Б.Энхбаяр гишүүн хүртэл энэ томилгоог эсэргүүцэж өөрийн цахим хуудсандаа байр сууриа илэрхийлжээ. Тэбээр, “Урьд нь ШЕЗ-ийн гишүүнээр ажиллаж байгаагүй хүнийг томилно гэж УИХ журмаа гаргасан. Энэ журмын дагуу олон хүн нэрээ дэвшүүлээгүй. Гэтэл Д.Зүмбэрэллхамыг болохоор болно гэж УИХ хоёр нүүр гаргаж байгаа юм уу . Үндсэн хуульд заасан хууль дээдлэх, хуулийн өмнө эрх тэгш байх зарчим УИХ-д хамаагүй юм уу эсвэл” гэжээ.
УИХ нээлттэй сонгон шалгаруулалтаар Шүүхийн Ерөнхий Зөвлөлийн гишүүнийг томилно гэх хуультай ч сонгон шалгаруулалт шударга бус байгаа нь Д.Зүмбэрэллхамын томилгоогоор тод харагдлаа. Өндөр оноо авч, сонгон шалгаруулалтад тэнцсэн нэр дэвшигч Д.Эрдэнэчимэгийг зориуд унагаж хэсэг бүлэг гишүүд Д.Зүмбэрэллхамыг оруулж буй нь сонгон шалгаруулалт бол нэр төдий халхавч гэдэг нь илчлэгдэв. Шүүх засаглалд нөлөөтэй Шүүхийн Ерөнхий зөвлөлд өөрсдийн хүнээ зүтгүүлдэг, “ лобби”-оор томилгоо хийдэг байдлыг УИХ хэзээ халах вэ ? Шүүхийн шинэчлэл ингэж явсаар ухралт болох вий МАН-ынхаан.
