Шинэ Зеландад коронавирусний цар тахал дэгдсэнээс хойш өдөрт илэрсэн халдварын тохиолдлын тоо анх удаа 2000 давж, ням гарагт 2522 хүнээс халдвар илэрсэн байна.
Мөн улсын хэмжээнд зуун хүн эмнэлэгт хэвтэн эмчлүүлж байгаа нь хамгийн өндөр үзүүлэлт болсон ч эрчимт эмчилгээний тасагт хэвтэн эмчлүүлж байгаа өвчтөн байхгүй гэдгийг холбогдох албаны төлөөлөгчид мэдээлжээ.
Хилээ хаах зэргээр цар тахалтай тэмцэх хамгийн хатуу арга хэмжээнүүдийг хэрэгжүүлсэн Шинэ Зеланд нь “COVID-19”-ийн хамгийн хүнд үеэс зайлсхийж чадсан юм. Гэсэн хэдий ч Ерөнхий сайд Жасинда Ардерн улс орноо цар тахлын шинэ үе шатанд орж байгааг мэдэгдсэн байна.
Тэрбээр “омикрон” хувилбар хурдацтай тархаж байгааг цохон анхааруулаад, вакцины гурав дахь тунд хамрагдахыг ард иргэддээ уриалжээ.
“Хэрэв та нэмэлт тунд хамрагдаагүй бол тариулах хэрэгтэй байна. Хэдийгээр 1.9 сая иргэн нэмэлт тунг хийлгэсэн ч 1.2 сая хүн хамрагдаагүй байна. “Омикрон” хувилбар хурдтай тархаж байгаа тул өөрийгөө болон өөрийн таньдаг эмзэг бүлгийн хүмүүсээ хамгаалахын тулд нэмэлт тунг тариулах хэрэгтэй” гэж тэрбээр мэдэгдсэн байна.
Хамгийн сүүлийн мэдээллээр, Шинэ Зеландын вакцинд хамрагдах насны хүн амын 84 хувь нь вакцины хоёр тунд, гуравны хоёр орчим нь нэмэлт тунг тариулжээ. Оклендын их сургуулийн судлаач, доктор Саманта Маршын хувьд эдгээр үзүүлэлтийг вирус тархахтай зэрэгцэн өснө хэмээн үзэж байна.
Эрх баригчид халдварын тохиолдол эрс нэмэгдэж байгааг үл харгалзан 2020 оны гуравдугаар сараас хойш хаалттай байгаа хилээ үе шаттайгаар ойрын долоо хоногоос эхлэн нээх төлөвтэй байна. Шинэ Зеландад цар тахал дэгдсэнээс хойш халдварын 31 мянга орчим тохиолдол илэрч, 53 хүн нас баржээ.
