Монгол дахь боловсролын тэгш бус байдлыг бууруулах хүсэл эрмэлзлэлтэй залуу манлайлагчдад зориулсан “Teach for Mongolia Fellowship” хөтөлбөр зарлалаа.
Цар тахлын уршгаар боловсролын тэгш бус байдал улам бүр даамжрах хандлагатай болоод буй. Тэгвэл Монгол Улсад анх удаа дэлхийн 61 оронд боловсролын хүртээмжийг нэмэгдүүлэх, тэгш бус байдлыг бууруулах зорилгоор үйл ажиллагаа явуулдаг “Teach for All” олон улсын байгууллагын гишүүн “Teach for Mongolia” байгууллагаас энэхүү хөтөлбөрөө зарлаж буй юм.
Хөтөлбөрийн хүрээнд орон нутгийн ЕБС-иудад 2 жил багшлах шинэ үеийн манлайлагч залуусыг сонгон шалгаруулж мэдлэг, ур чадварыг нь хөгжүүлэх олон төрлийн сургалтад хамруулан боловсролын салбарын тэгш бус байдлыг бууруулахад шууд хувь нэмрээ оруулах боломжийг олгох юм. Хөтөлбөр нь салбар болон мэргэжил харгалзахгүйгээр бакалаврын зэрэгтэй шинээр төгсөгч, төгсөөд удаагүй байгаа залуучууд, мэргэжлээрээ 1-2 жил ажилласан залуу мэргэжилтнүүдэд нээлттэй ба улс эх орныхоо хөгжил дэвшилд гар бие оролцон сайн сайхан ирээдүйг бүтээх тэмүүлэлтэй шинэ үеийн манлайлагч залуусыг сонгон шалгаруулна.
Хөтөлбөрт хамрагдах хүсэлтэй залуучуудын материалыг энэ сарын 15-наас 2022 оны тавдугаар сарын 1-нийг хүртэл WWW.TEACHFORMONGOLIA.MN хаягаар хүлээн авна.
“Teach For Mongolia” нь чанартай, хүртээмжтэй боловсролыг хүүхэд бүрт эзэмшүүлэх үйлсэд хувь нэмрээ оруулах хүсэлтэй шинэ үеийн манлайлагч залуусыг сонгон шалгаруулж орон нутгийн ерөнхий боловсролын сургуулиудад 2 жил багшлах боломжоор хангах мөн тэдэнд мэдлэг, ур чадвараа улам хөгжүүлэх олон төрлийн сургалт болон менторшипд хамруулахын зэрэгцээ ирээдүйгээ төлөвлөхөд нь чиглүүлэн дэмжлэг үзүүлдэг ашгийн төлөө бус байгууллага юм.
