Сүрьеэтэй тэмцэх дэлхийн өдрийг “Сүрьеэгүй ирээдүйн төлөө хөрөнгө оруулалтыг нэмэгдүүлье” уриан дор тэмдэглэж байна. Энэ хүрээнд “Сүрьеэгээс сэргийлэх, сүрьеэг эрт илрүүлэх үйл ажиллагааг эрчимжүүлэх нь” сэдэвт зөвлөгөөн өчигдөр боллоо.
Коронавируст цар тахлын үед сүрьеэгийн тусламж, үйлчилгээг орхигдуулахгүй байх, сүрьеэгээс сэргийлэх үйл ажиллагаанд төрийн захиргааны байгууллагын оролцоог нэмэгдүүлэх, төрийн болон төрийн бус байгууллагууд, салбар дундын уялдаа холбоог сайжруулах, хөрөнгө оруулалтыг нэмэгдүүлэх хэлбэрээр эрт илрүүлгийг эрчимжүүлж, улмаар сүрьеэгийн өвчлөлийг бууруулах зорилготой зохион байгуулсан зөвлөгөөнд хууль тогтоох байгууллагыг төлөөлж Улсын Их Хурлын гишүүн, Нийгмийн бодлогын байнгын хорооны дарга М.Оюунчимэг, Улсын Их Хурлын гишүүн Ё.Баатарбилэг, Ж.Чинбүрэн, Л.Мөнхбаатар нар танхимаар болон цахимаар оролцож, байр сууриа илэрхийллээ.
Зөвлөгөөний нээлтэд хэлсэн үгэндээ Улсын Их Хурлын гишүүн, Нийгмийн бодлогын байнгын хорооны дарга М.Оюунчимэг дэлхий дахинаа нийгмийн эрүүл мэндийн тулгамдсан асуудал болж нас баралтын тэргүүлэх шалтгааны нэг болж буй сүрьеэгийн тархалтаар манай улс дэлхийд 10 дугаарт, ДЭМБ (Дэлхийн эрүүл мэндийн байгууллага)-ын Номхон Далайн баруун бүсийн 37 орноос эхний дөрөвт орж буйг дурдаад, сүрьеэгийн илрүүлэлтийг нэмэгдүүлэх, идэвхтэй илрүүлгийг зохион байгуулах, сүрьеэд өртөх эрсдэлт бүлгийн хүн ам, хавьтлын урьдчилан сэргийлэх үзлэгийг тогтмол зохион байгуулах, хамрах хүрээг өргөжүүлэх, оношилгооны тоног төхөөрөмжийг нэмэгдүүлэх, хүн амын мэдлэг мэдээллийг дээшлүүлэх сургалт сурталчилгааг тогтмол зохион байгуулах, сүрьеэгийн эмч ажиллагсдын орон тоог нэмэгдүүлэх шаардлагатайг тэмдэглэв.
Түүнчлэн, “Улсын Их Хурал, Нийгмийн бодлогын байнгын хорооноос хүн амын эрүүл мэнд, урьдчилан сэргийлэх ажилд анхааран ажиллаж байна. Нэг жишээ нь 2018 онд Улсын Их Хурлын гишүүн Ё.Баатарбилэгийн ахалсан Улсын Их Хурал дахь “Сүрьеэгүй Монгол” лобби бүлгээс Халдварт өвчин судлалын үндэсний төвийн харьяа Сүрьеэгийн эмнэлгийн цогцолбор байгууламжийг хотын төвөөс зайдуу, ой модтой, нийтийн тээврээр очих боломж бүхий газарт барих ажлыг санаачлан эхлүүлж, жил бүрийн улсын төсөвт шаардлагатай хөрөнгийг тусган ажиллаж байна. Сүрьеэ нь нийгмийн халдварт өвчин учир цаашдаа өсвөр үе, залуучуудыг энэ өвчнөөс сэргийлэх бүх талын арга хэмжээг хойшлуулшгүй авч хэрэгжүүлж, салбар дундын хамтын ажиллагааг эрчимжүүлье. Шийдвэр гаргагч нарт зориулсан зөвлөгөөнийг улс орон даяар нэгдсэн зохион байгуулалттай хийж байгаа нь цаг үеэ олсон, салбар хоорондын хамтын ажиллагааг өргөжүүлэх, оролцоог нэмэгдүүлэх үр дүнтэй арга хэмжээ болж байна” гэлээ.
Зөвлөгөөнд цахимаар оролцсон Улсын Их Хурлын гишүүн Ж.Чинбүрэн “Манай улсыг 2021 онд ДЭМБ-аас сүрьеэгийн дарамт өндөртэй 30 орны нэгээр зарласан. Сүүлийн жилүүдэд хүүхдийн сүрьеэгийн тохиолдол нэмэгдэж байна. Өвчилсөн иргэд түүнийгээ мэдэхгүй явсаар хүндрүүлэхийн зэрэгцээ бусдад халдвар тараах эрсдэлтэй учир эрт илрүүлгийг нэмэгдүүлэх, сүрьеэгийн далд халдварын эмчилгээний хамралтыг нэмэгдүүлэх, эмч, мэргэжилтэн, эрүүл мэндийн байгууллагаас гадна иргэд, олон нийтийн оролцоог нэмэгдүүлэх, хууль тогтоох, бодлого боловсруулах түвшинд онцгойлон анхаарч ажиллах шаардлагатай. Өнөөдрийн энэхүү уулзалт хэлэлцүүлэг хүлээгдэж буй үр дүнд хүрнэ гэдэгт итгэлтэй байна гэв.
Зөвлөгөөн Улаанбаатар болон Хөвсгөл аймагт нэгэн зэрэг танхим болон цахим хэлбэрээр зохион байгуулагдсан бөгөөд хууль тогтоох байгууллага, аймаг, нийслэл, дүүргийн Засаг захиргааны байгууллагын холбогдох удирдлага, эрүүл мэндийн байгууллага, нийгмийн халамжийн болон бусад төрийн байгууллага зэрэг шийдвэр гаргагчдын төлөөлөл оролцлоо гэж УИХ-ын Хэвлэл мэдээлэл, олон нийттэй харилцах хэлтсээс мэдээлэв.
