Боловсрол, шинжлэх ухааны сайд Л.Энх-Амгалан Их Британийн Ерөнхий сайдын Монгол Улсыг хариуцсан худалдааны элч, парламентын гишүүн Даниел Кавченскийг хүлээн авч уулзаж, боловсрол, шинжлэх ухааны салбарын хамтын ажиллагааны асуудлаар санал солилцлоо.
Монгол, Англи улсын боловсролын салбарын хамтын ажиллагааны хүрээнд Чевнингийн тэтгэлэгт хөтөлбөрийг хэрэгжүүлснээр тэтгэлэгт 180 гаруй хүн хамрагджээ. Энэ тоог нэмэгдүүлэх зорилготой. Манай улсад Кембрижийн хөтөлбөрөөр төрийн өмчийн гурав, хувийн 22 сургууль хичээллэж байна. Цаашид Кембрижийн стандарттай сургуулиудыг нэмэгдүүлэх шаардлага тулгарч буйг уулзалтын үеэр салбарын сайд дурьдав.
Их Британий Ерөнхий сайдын Монгол Улсыг хариуцсан худалдааны элч, парламентын гишүүн Даниел Кавченски хэлэхдээ Монгол Улс бидний том түнш. Иймдээ ч боловсролын салбарт хөрөнгө оруулж, дэмжиж ажиллана гэдгээ хэлсэн юм.
Монгол-Британийн Дугуй ширээний 14 дүгээр хуралдаан ирэх тавдугаар сарын 10-12-ны өдрүүдэд Улаанбаатар хотноо зохион байгуулагдана. Мөн тавдугаар сарын 22-25-ны өдрүүдэд Лондон хотноо Дэлхийн боловсролын чуулга уулзалт болно. Эдгээр уулзалтуудын үеэр хоёр орны боловсролын салбарын хамтын ажиллагааг өргөжүүлэх чиглэлээр ярилцахаа талууд илэрхийлжээ.
