Шадар сайд С.Амарсайхан ипотекийн зээлийн хөтөлбөрийн хэрэгжилтийг судлах ажлын багийн тайланг танилцуулахаар Засгийн газрын өнөөдрийн ээлжит хуралдаанд төлөвлөсөн байна.
Тодруулбал, дунд орлоготой өрхийг орон сууцжуулах, гэр хорооллын дахин төлөвлөлтийг тэлэх, агаар, хөрсний бохирдлыг бууруулах зорилгоор Засгийн газар 2013 оноос Ипотекийн зээлийн хөтөлбөрийг Монгол банкаар дамжуулан хэрэгжүүлж буй юм. Гэвч МИК ипотекийн зээлд хамрагдсан иргэдийн эргэн төлөлтөөс сар бүр хувь авч, зөвхөн 2014-2018 онд 282 тэрбум төгрөгийн цэвэр ашиг олж, 2019 оноос хойш тайлангаа ил тод гаргаж өгөөгүй зэрэг асуудал үүссэн гэдгийг Шадар сайд С.Амарсайхан өмнө нь мэдээлж байв. Улмаар ипотекийн зээлийн хүртээмжийг нэмэх, найм болон зургаан хувийн зээлийн хүүг бууруулах гарц боломжийг эрэлхийлэх, залуу гэр бүлүүдийг дэмжих хүрээнд урьдчилгаа төлбөрийг багасгах, цаашлаад ипотекийн зээлийн тогтолцоог олон улсын жишигт нийцүүлэн илүү боловсронгуй болгох зэрэг асуудлыг холбогдох албаныханд үүрэг болгосон. Энэ хүрээнд Сангийн яамаар ахлуулсан ажлын баг байгуулсан бөгөөд тус баг залуу гэр бүлүүдийг дэмжих хүрээнд тус зээлийн урьдчилгаа төлбөрийг одоогийн 30 хувиас багасгаж, 20 хувь болгох 2013-2020 онд ипотекийн 8 хувийн зээлд хамрагдсан 63 мянга орчим иргэдийн зээлийн хүүг бууруулах боломжийг судалж буй юм. Тус баг үр дүнгээ Засгийн газар танилцуулах болжээ.
