Зам тээврийн удирдлагын ухаалаг систем RFID ашиглалтад оруулснаар замын төлбөр хураамжийг км тутамд 15 төгрөгөөр тооцож авдаг болно.
Нийслэлийн иргэд жилд дунджаар 10 мянган км зам туулдаг, Улаанбаатарт зорчиж буй машины 18 хувь нь хөдөө орон нутгийн машин байдаг судалгаа бий. Ойрын аймаг, сумдын иргэд амралтын өдрүүдэд ирж, такси үйлчилгээ эрхэлдэг. Эдгээр машины хувьд км тутамд төлөх төлбөр нь 45 төгрөг байх юм. Товчоодоор орж ирэхэд 1500 төгрөг төлдөг хэвээр байхыг нийслэлийн Сургалт судалгаа, олон нийттэй харилцах газар мэдээлэв.
Улаанбаатар хотын 1181 км орчим замын 85 хувь нь ашиглалтын шаардлага хангахгүй, жил бүр нөхөөс, засвар хийдэг зам байна. Замын сангийн хөрөнгө зам ашигласны төлбөрөөс бүрддэг. Замын төлбөр моторын багтаамжаас хамааран бага оврын машин 20 мянга, том машин 40 мянган төгрөгийг жилдээ төлдөг.
Түгжрэлийг багасгах үүднээс нийслэлийн 2 захад их багтаамжийн зогсоолууд шинээр барьж эхэлжээ. Ингэснээр хөдөө, орон нутгаас ирж буй хүмүүс үнэгүй зогсоолд машинаа тавих боломж бүрдүүлэх бөгөөд тус зогсоол руу богино эргэлтийн автобус явуулахаар төлөвлөж байгаа аж. Түүнчлэн, тээврийн хэрэгсэл цахим гэрчилгээтэй болгох юм. Ингэснээр тээврийн хэрэгслийн цаасан хэлбэрээр гэрчилгээг байхгүй болгож, тусгай мэдрэгч /tag/-тэй болсох юм. Энэ нь төлбөр тооцоог бүртгэж, бүрэн барагдуулахад анхаарч, автомашины үзлэг оношилгооны хамрагдалтыг ч нэмэх шийдэл хэмээн үзэж байгаа аж.
