ЭМЯ-наас цаг үеийн асуудлаар мэдээлэл хийлээ.
ХӨСҮТ-ийн дэд захирал Ц.Чинбаяр “Амьсгалын замын синцитиал вирус 0-4 насны хүүхдийн өвчлөлийн зонхилох шалтгаан болж байна. Хүүхэд өндөр халуурч байгаа тохиолдолд заавал эмчийн зөвлөгөөний дагуу асаргаа сувилгаа, эмчилгээг хийх хэрэгтэй. Өнөөдрийн байдлаар ХӨСҮТ-д 198 хүүхэд томуу, томуу төст өвчний улмаас хэвтэн эмчлүүлж байгаа бөгөөд 20 орчим нь уушгины хатгаагаар хүндэрсэн. Тархалт өндөр байгаа энэхүү вирус нь богино хугацаанд уушгины доод замыг гэмтээж хатгаа болж хүндэрдэг. Иймд хүүхдүүдээ дулаан хувцаслаж, амин дэмтэй хүнсээр хооллох, гэр орондоо чийгтэй цэвэрлэгээ хийх, олон нийтийн дунд хүүхдээ авч явахгүй байхыг зөвлөж байна” гэв.
ЭМЯ-ны Эмнэлгийн тусламж үйлчилгээний газрын дарга Ж.Нарангэрэл” Томуу томуу төст өвчнөөр 15 хүртэлх насны хүүхдэд зонхилон халдварлагдаж байгаа учир гэрийн эргэлт буюу өрхийн тусламж үйлчилгээг эрчимжүүлэн ажиллаж байна. Томуугийн хүндрэлтэй холбоотой эмнэлэг дээр 2000 гаруй ор дэлгэсэн. Энэ жилийн тухайд улсын зургаан эмнэлэг дээр томуугийн вирусээр өвчилж хүндэрсэн тохиолдолд хэвтэн эмчлүүлэх боломж бүрдсэн. Шинэ жилийн баярын өдрүүдтэй холбоотойгоор хүүхдээ агаар салхинд авч гарах, мөсөн үзүүлбэр зэрэг газраар авч явахдаа дулаан хувцаслаж авч явахыг зөвлөж байна” гэлээ.
