Монгол Улсад Үндэсний эрх чөлөөний хөдөлгөөн 1911 онд ялж, төрийн таван яамыг байгуулахдаа “САНГИЙН ХАМАГ ХЭРГИЙГ БҮГД ЗАХИРАН ШИЙТГЭГЧ ЯАМ” буюу одоогийн “САНГИЙН ЯАМ”-ыг байгуулсан түүхтэй. Монгол Улсын тусгаар тогтнолыг эдийн засаг, санхүүгийн хувьд баталгаажуулах чухал үүргийг үндэсний эрх чөлөөний хувьсгалын удирдагчдын нэг Г.Чагдаржавын тэргүүлсэн Сангийн яам хүлээж, тулгамдсан олон зорилтыг амжилттай хэрэгжүүлсэн юм. Тус яам нь дотоод хүү, гадаад хүү, гааль хураах гурван хэлтэстэй үйл ажиллагаагаа эхлүүлж байлаа.
Үндэсний эрх чөлөөний тэмцлийн хүнд бэрх цаг үеэс өнөөгийн орчин цагийн санхүүгийн албаны түүх нь энэ хугацаанд ажиллаж амьдарч оюун ухаан, сэтгэл зүрх, хөдөлмөр бүтээлээ зориулж ирсэн үе үеийн санхүү эдийн засагчдын маань хамтдаа бүтээлцсэн нэгэн зууны түүх билээ.
Энэ хугацаанд бүхий л нөөц бололцоогоо дайчлан, эх орныхоо ирээдүйн хөгжил дэвшилд хувь нэмэрээ оруулсаар ирсэн үе үеийн санхүү, эдийн засагчид та бүхэндээ Монгол Улсад орчин цагийн санхүүгийн алба үүсэж хөгжсөний 111 жилийн ойн баярын мэндийг дэвшүүлье.
