Дэлхий нийтийг хамарсан КОВИД-19 цар тахлаас үүдэлтэй эдийн засгийн хязгаарлалтууд, БНХАУ-ын хэрэгжүүлж байгаа “ТЭГ-Ковид” бодлого болон ОХУ-Украины дайнаас шалтгаалан сүүлийн 40 жил байгаагүй үнийн өсөлт, эдийн засгийн сорилттой 2022 онд дэлхий нийтээрээ нүүр тулсан хэдий ч Монгол Улсын Засгийн газраас эдийн засгаа сэргээхэд чиглэсэн боломжит бүхий л арга хэмжээг авч хэрэгжүүллээ. Үүний үр дүнд:
- 2022 оны 1-р улиралд -3.9 хувьд хүрч унаад байсан эдийн засгийн өсөлтийг оны эцэст 4.0 орчим хувьд хүргэж сайжрууллаа.
- 2020 онд 4.4 их наяд төгрөг байсан төсвийн алдагдлыг бууруулсаар 2023 онд 1.4 их наяд төгрөг байхаар баталлаа.
- Төвлөрлийг сааруулах бодлогын хүрээнд Улаанбаатар хотоос орон нутагт бизнесээ шилжүүлж байгаа иргэн, аж ахуйн нэгжүүдэд нэг хувийн хөнгөлөлттэй зээл, шилжин амьдрах иргэдэд гурван хувийн ипотекийн зээл олгохоор боллоо.
- Өндөр насны тэтгэврийн доод хэмжээг 500 мянган төгрөгт хүргэж нэмэгдүүллээ.
- Тэг зогсолтод хүрээд байсан экспортыг нэмэгдүүлэхэд чиглэсэн цогц арга хэмжээ авч хэрэгжүүллээ.
- Гол нэр төрлийн зарим бараа, бүтээгдэхүүний үнийн өсөлт, хомсдолоос сэргийлэх, сөрөг нөлөөллийг бууруулах тухай хуулийг баталлаа.
- Төрийн хэмнэлтийн тухай хуулийг батлуулснаар ирэх 2023 онд нэг их наяд төгрөгийн зардлын хэмнэлтийг бий болголоо.
- Хувийн хэвшлийн хөрөнгө оруулалт, оролцоог нэмэгдүүлэх, төсвийн ачааллыг бууруулах эрх зүйн шинэчлэлийн хүрээнд “Төр хувийн хэвшлийн түншлэл”-ийн тухай хуулийг батлууллаа.
- Эрүүл мэндийн салбарт үүссэн 264 тэрбум төгрөгийн өрийг төлж барагдууллаа.
- Чингис бондын үлдэгдэл 136.8 сая ам.долларын төлбөрийг бүрэн төлж барагдууллаа.
- Хөгжлийн банкны нэг их наяд төгрөгийн чанаргүй зээлийг төлүүлж, банкны үйл ажиллагааг тогтворжууллаа.
- Самурай бондын эргэн төлөх эх үүсвэрийг хугацаанаас нь өмнө 100 хувь бүрдүүллээ.
- Төрийн банкны IPO-г системийн нөлөө бүхий банкууд болон төрийн өмчит компаниудыг манлайлан амжилттай гаргалаа.
- “Монголын Хөрөнгийн Бирж” ТӨХК олон нийтийн компани болж анхдагч зах зээлийн арилжааг амжилттай хийлээ.
- Зээлжих зэрэглэл тогтоогч S&P, Moody’s, Fitch агентлагуудтай хамтран ажиллаж МУ-ын зээлжих зэрэглэлийг цар тахал, дайны хүнд цаг үед хэвээр хадгалж чадлаа.
- Улаанбаатар хотод шинээр 457 автобус иж бүрэн тоноглогдсон автопаркийн хамт ашиглалтад оруулж, нийтийн тээврийн парк шинэчлэлийг хийхээр боллоо.
- “Шинэ сэргэлтийн бодлого”, “Боомтын сэргэлт”-ийн ажлын хүрээнд “Замын-Үүд боомт”-ыг олон улсын жишигт нийцүүлэн шинээр барих, хүчин чадлыг нэмэгдүүлэх төслийн бүтээн байгуулалтын ажлын Зорчигч тээврийн хэсэг ашиглалтад ороход бэлэн боллоо.
