Нийслэлийн нийтийн тээвэрт зориулж аваад буй 117 автобусаас 30-ыг нь өнөөдөр үйлчилгээнд гаргалаа.
Түүнчлэн, лхагва гарагт 30, баасан гарагт 30 автобус, үлдсэнийг нь ирэх 7 хоногт үйлчилгээнд гаргах юм. Ингэснээр тээврийн хэрэгслийн хүртээмжийг нэмж, шинэ суурьшлын бүс рүү чиглэл нээх, богино эргэлт хийх нөхцөл бүрдэнэ. Нийтийн тээврийн үйлчилгээний хүлээгдэл дунджаар 4-8 минут байснаар зорчих эрэлтийг хангадаг бол тээврийн хэрэгслийн хүртээмж, түгжрэлээс шалтгаалан энэ хугацаа 15 минут орчим байгаа. Шинэ автобусууд үйлчилгээнд гарснаар хүлээх хугацаа багасах боломжтой. Мөн 107 автобусыг үйлдвэрлэж байгаа, ирэх сард багтаад оруулж ирэхийг нийслэлийн Засаг даргын Хэвлэлийн төлөөлөгч Н.Сугар хэллээ.
2022 онд үйлдвэрлэсэн шинэ автобусны техникийн үзүүлэлт нь евро стандартын шаардлага хангасан, 8400 cc хүчин чадалтай, евро V дизель хөдөлгүүртэй, хана, тааз, шал зэрэг нь гал, усанд тэсвэртэй, хажуу цонх нь бууралттай, цантахгүй, давхар шилтэй, гулсаж онгойдог, агааржуулалт, иж бүрэн дулаалгын системтэй, жолоочийн суудал зөөлрүүлэгчтэй, зориулалтын арьсаар бүрсэн, чанга яригчтай, уламжлалыг хадгалсан өнгө үзэмж, гадна загвартай, тусгай хэрэгцээт иргэнийг тээвэрлэхэд зориулсан налуу шат, тэргэнцэрийн бэхэлгээтэй, нийтийн тээврийн үйлчилгээний чиглэлийн дугаар, хаяг бүхий цахим дэлгэцийг автобусны урд, баруун, хойд талд байрлуулсан, хөдөлгүүрийн хэсэгт галын аюулаас урьдчилан сэргийлэх автомат гал унтраагчтай юм.
