Зам тээврийн хөгжлийн яам болон ТЦА-наас хамтран цаг үеийн асуудлаар мэдээлэл хийлээ. Тэд “Монгол Улсад замын хөдөлгөөний аюулгүй байдлыг хангах долоо хоногийн аян энэ сард өрнүүлнэ. Замын хөдөлгөөний аюулгүй байдлыг хангах нь дэлхий нийтийн хэмжээнд тулгамдсан асуудал болоод байна. Учир нь дэлхий даяар зам тээврийн ослын улмаас жилд дунджаар 1.3 сая хүн амиа алдаж, 50 сая хүн гэмтэж бэртдэг гэх тоон үзүүлэлт бий. Бусад орнуудын адил манай улс нь зам тээврийн хөдөлгөөний аюулгүй байдал хурцадмал асуудал болсон. Тодруулбал, сүүлийн 5 жилийн судалгаанаас харахад жил бүр ойролцоогоор 25 мянган зам тээврийн осол бүртгэгдэж байгаа бөгөөд 500 гаруй иргэн амиа алдаж, 3400 гаруй хүн гэмтэж бэртсэн юм. Иймд замын хөдөлгөөний аюулгүй байдалд дэлхий нийтээрээ анхаарал хандуулж НҮБ болон ДЭМБ-аас жил бүр тавдугаар сард замын хөдөлгөөний аюулгүй байдлыг хангах долоо хоногийн аян тодорхой сэдвийн дор зохион байгуулж ирсэн. Тодруулбал, “Хамгаалах бүсний хэрэглээ”, “Хурдаа хяна”, “Хүүхдийг хамгаал”, “Мотоциклийн аюулгүй байдал”, “Хөдөлгөөний нөхцөл байдлыг сайжруул” зэрэг уриатай аянуудыг зохион байгуулж ирсэн. Энэ жил “Урьтаж ухаар” гэсэн нэртэй аян тавдугаар сарын 15-наас эхлэн долоо хоногийн хугацаанд зохион байгуулахаар Нэгдсэн Үндэсний байгууллага болон ДЭМБ-аас зарласан юм.
Үүнтэй холбогдуулаад Монгол Улсын хэмжээнд ЗТХЯ, Замын хөдөлгөөний аюулгүй байдлыг хангах үндэсний зөвлөлийн ажлын алба, ДЭМБ, ЭМЯ, БШУЯ, ТЦА зэрэг холбогдох төрийн болон олон улсын байгууллагууд хамтраад төлөвлөгөөг боловсруулж Замын хөдөлгөөний аюулгүй байдлын үндэсний зөвлөлийн орлогч дарга буюу Зам тээврийн хөгжлийн сайдаар батлуулан хэрэгжүүлж ажиллана. Төлөвлөгөөний дагуу 16 ажлыг энэ долоо хоногт хийнэ. НҮБ болон ДЭМБ-аас энэ жилийн аяныг зохион байгуулахтай холбоотой явган зорчигч, унадаг дугуйгаар зорчигч болон нийтийн тээврийн хэрэгслээр зорчигч нарын аюулгүй байдлыг хангах чиглэл өгсөн. Үүний дагуу эдгээр зорчигчийн аюулгүй байдлыг хангах зөвлөмж, танилцуулгыг иргэдэд хүргэнэ” гэв.
Тээврийн цагдаагийн албаны Урьдчилан сэргийлэх хэлтсийн ахлах мэргэжилтэн Г.Отгонтамир “Дулааны улиралтай золгосонтой холбоотойгоор хүүхэд багачууд явганаар хөдөлгөөнд оролцох, унадаг дугуйтай харгалзах хүнгүй гадуур явах байдал нэмэгдэж байна. Гэтэл өнгөрсөн онд зам тээврийн ослын улмаас 76 хүүхэд амиа алдсаны тав нь унадаг дугуйтай хөдөлгөөнд оролцсон. Мөн зам тээврийн ослын улмаас 810 хүүхэд гэмтсэний 30 гаруй тохиолдол нь унадаг дугуйтай явж байгаад осолдсон байна. Иймд ТЦА нь Зам тээврийн хөгжлийн яамтай хамтран “Урьтаж ухаар” гэсэн нэртэй аяныг өрнүүлнэ” гэлээ.
