Өнөөдөр Засгийн газрын ээлжит хуралдаанаас гарсан зарим шийдвэрийн талаар БШУ-ны Сайд Л.Энх-Амгалан мэдээлж байна.
Тэрээр “2022-2023 оны хичээлийн жилд 859 сургуульд 746 мянган сурагч суралцсан. Үүнээс улсын хэмжээнд 6 сургуульд 3 ээлжээр 1451 гаруй сурагч суралцлаа. Одоо шинээр баригдаж буй 18 барилга удааширсан сургуулийн 11310 гаруй хүүхэд 20 түрээсийн байранд суралцаж байна. Жил бүр 70 мянга гаруй 6 настан шинээр элсэн ороход 12-р ангийн 35 мянган хүүхэд төгсдөг. Тиймээс хүүхдийн тоо, ачаалал 35 мянгаар нэмэгддэг. Тиймээс гурван ээлжид орох эрсдэл үүсэхээр харагдаж байна. Шинээр ашиглалтад орохоор төлөвлөгдсөн 20 сургууль шинээр элсэх сурагчдын 40 хувийг л хангахаар байгаа юм. 2023-2024 оны хичээлийн жилд Нийслэлд өндөр ачаалалтай 47 сургуулийн 33314 сурагч, 17 аймгийн 34 сургуульд 4379 сурагч гурван ээлжээр хичээллэх эрсдэл үүссэн тул дараах шийдлийг гаргалаа. Үүнд,
- Сургуулиудад шинээр өргөтгөл хийх, барилгын ажлыг эрчимжүүлэх
- Банкны барьцаанд байгаа хураагдсан барилга, объектуудыг сургуулийн зориулалттай ашиглах
- Хамран сургах тойргийг шинэчлэх, нэг ангид 45-аас дээшгүй сурагчтай байх
- Их дээд сургуулиудын харьяаны ахлах сургуулийн бүтцийг өөрчлөх гэв.
