Өвлийн олимпийн наадамд хиймэл цас ашиглах нь түгээмэл байдаг. Энэ удаагийн Бээжин 2022 наадам ч ялгаагүй хиймэл цасан дээр зохион байгуулагдаж буй билээ.
Хятадын цаг уурын албанаас олимпийн наадам болж буй Бээжин хот тэргүүтэй хойд зүгийн бүс нутгуудаар хүчтэй цасан шуурга шуурахыг өчигдөр /2022.02.13/ анхааруулав. Зарим бүс нутгуудаар Бямба гаригаас цас ороод эхэлжээ. Бээжин хотын хувьд цас орох нь ховор, ердийн жилүүдэд нийтдээ 15 см ч хүрэхгүй бага цас ордог. Олимпийн наадам эхэлснээс хойш ийнхүү анхны цас орж буй хэдий ч Бээжинд агаарын хэм ердөө -6 байна.
Гэнэт орсон цас хэвийн хэмжээнээс хэтэрснээр зарим тэмцээнүүд хойшлоод байна. Тухайлбал, Жанжякоу хотод болох байсан чөлөөт цанын тэмцээн хойшилж, эрэгтэйчүүдийн слалом цанын тэмцээн ч их цасан дунд явагджээ. Эрэгтэй цаначдыг эхний тойргоо дуусгасны дараа зохион байгуулагчид хоёр дахь тойргийг хойшлуулах санал гаргасан. Түүнчлэн эмэгтэйчүүдийн цанын уруудах төрлийн бэлтгэл цуцлагдаж, Мягмар гариг хүртэл хойшлов.
Хятадын эрх баригчид онцын шаардлагагүй гадаах үйл ажиллагаануудаа зогсоохыг иргэдэд зөвлөжээ.
Эх сурвалж: NBC
