Францын Ерөнхийлөгч Эмманюэль Макрон АНУ-ын Ерөнхийлөгч Жозеф Байден болон ОХУ-ын Ерөнхийлөгч Владимир Путин нартай утсаар ярьжээ. Францын төрийн тэргүүн Ж.Байден, В.Путин нарын хооронд дээд хэмжээний уулзалт зохион байгуулж, дараа нь Европын аюулгүй байдал, стратегийн тогтвортой байдлын асуудлаар сонирхогч бүх талтай уулзалт хийхийг санал болгов гэж Елисейн ордны цахим хуудсанд даваа гарагт гарсан мэдээлэлд дурджээ.
Энэхүү уулзалтаар хэлэлцэх асуудлыг АНУ-ын Төрийн нарийн бичгийн дарга Энтони Блинкен, ОХУ-ын Гадаад хэргийн сайд Сергей Лавров нар хоёрдугаар сарын 24-нд хэлэлцээ хийхдээ бэлтгэх ёстой байна.
Ж.Байден, В.Путин нарын дээд хэмжээний уулзалт ОХУ Украин руу довтлоогүй тохиолдолд л болно гэж Елисейн ордон цохон тэмдэглэжээ. Удахгүй болох уулзалтын агуулгыг бэлтгэхийн тулд Эмманюэль Макрон сонирхогч бүх талтай хамтран ажиллах бодолтой байгаа аж.
Сүүлийн хэд хоногт ОХУ, Украины сөргөлдөөн дэх түгшүүртэй байдал улам хурцаджээ. Зөвхөн хоёрдугаар сарын 19-нд л гэхэд гал зогсоох дэглэмийг 1500 гаруй удаа зөрчсөн гэж ЕАБХАБ-ын тусгай хяналтын байгууллага мэдээлсэн байна.
