ОХУ Украин улс руу гал нээсэн цагаас эхлэн дэлхийн улс орнууд, томоохон холбоод Оросын эсрэг хариу хориг арга хэмжээ авсаар байна. Орос-Украины мөргөлдөөний улмаас өнгөрсөн бямба гаригт олон улс дахь ОХУ хөлбөмбөгийн шигшээ багийн тоглолтууд цуцлагдсан. Тэгвэл өнгөрсөн шөнө Дэлхийн хөлбөмбөгийн холбоо буюу FIFA-гаас ОХУ-ын эсрэг авч буй арга хэмжээгээ танилцууллаа.
Олон улсын олимпийн хорооноос гаргасан зөвлөмжийн дагуу FIFA ОХУ-ын нутаг дэвсгэрт олон улсын тэмцээн зохион байгуулахгүй, цаашид Оросын хөлбөмбөгийн багийг ОХУ-ын шигээ баг гэхгүйгээр Оросын хөлбөмбөгийн холбоо (RFU) нэрээр оролцуулах, олон улсын тэмцээнд ОХУ-ын төрийн далбааг харуулахгүй, төрийн дууллыг эгшиглүүлэхгүй байх шийдвэрийг гаргажээ.
FIFA-аас эдгээр арга хэмжээг дараагийн мэдэгдэл хүртэл хэрэгжих бөгөөд уг шийдвэр, ОХУ-ын эсрэг хариу арга хэмжээг FIFA-гийн ерөнхийлөгч болон холбооны зургаан ерөнхийлөгч санал нэгтэй дэмжсэн гэж мэдэгдэв. Уг шийдвэртэй холбоотойгоор ОХУ-д зохион байгуулахаар төлөвлөж байсан Аваргуудын лигийн тоглолтыг зохион байгуулах эрхийг Франц улсад шилжүүлжээ.
FIFA-гийн мэдэгдэлд “Юуны өмнө ОХУ-ын зүгээс Украин руу түрэмгий хүч хэрэглэсэн үйлдлийг буруушааж байгаагаа дахин илэрхийлье. “Хүчирхийлэл хэзээ ч шийдэл биш бөгөөд FIFA Украинд болж мөргөлдөөн, дайны улмаас хохирол амссан хүмүүст эмгэнэл илэрхийлж, Украины ард түмэнд эв нэгдэлтэй байхыг уриалж байна” гэжээ.
Мөн FIFA-гаас дэлхий дахинд энх тайвныг сэргээж, нэн яаралтай гал зогсоох яриа хэлэлцээ хийхийг уриалсан байна. Зарим улс FIFA-гийн гаргасан шийдвэрт сэтгэл дундуур байгаагаа илэрхийлсэн бөгөөд хэчнээн ОХУ-ын шигшээ багийн нэрийг өөрчилсөн ч Оросуудтай талбай дээр тоглохгүй гэдгээ мэдэгдээд байна. Одоогоор Чех, Польшийн хөлбөмбөгийн холбоо ОХУ-ын багтай тоглохгүй гэдгээ мэдэгджээ.
Эх сурвалж: USA Today
