Грект “COVID-19”-ийн “омикрон” хувилбарын эсрэг үйлчилгээтэй вакцинуудын дархлаажуулалтыг есдүгээр сарын 14-нөөс эхлүүлэхээр болсон талаар тус улсын эрүүл мэндийн байгууллагын удирдлагууд даваа гарагт мэдээлжээ.
“Pfizer/BioNTech”, “Moderna” компанийн шинэчилсэн вакцинуудыг эхний ээлжид 60-аас дээш насны иргэд, архаг хууч өвчтэй хүмүүс, эмнэлгийн болон асрамжийн газрын ажилтнуудад нэмэлт тунгийн журмаар тарих ажээ.
Хэвлэлийн бага хурлын үеэр Вакцинжуулалтын хорооны дарга Мариа Теодоридугийн мэдээлснээр, эдгээр вакцин нь “омикрон”-ы “BA.1”, “BA.2”, “BA.5” зэрэг дэд хувилбарын эсрэг “илүү үр дүнтэй” байна.
“Грект өнөөдрийг хүртэл 21 350 000 тун вакциныг тариад байгаа бөгөөд 7.6 сая гаруй хүн вакцинжуулалтад бүрэн хамрагдаад байна. Мөн 5.8 сая гаруй хүн нэмэлт тун тариулсан” гэж Эрүүл мэндийн яамны төлөөлөгч Мариос Фемистоклеус мэдээлжээ.
Грект энэ хавраас “COVID-19”-тэй тэмцэх хязгаарлалтын арга хэмжээнүүдийг сулруулаад байгаа бөгөөд халдварын шинэ тохиолдлын тоо зуны туршид буурсныг долоо хоног тутмын албан ёсны тоон мэдээлэл харуулж байна. Улсын хэмжээнд наймдугаар сарын 29-нөөс есдүгээр сарын 4-нд халдварын 40 мянга гаруй шинэ тохиолдол илэрч, 180 хүн нас баржээ.
