БНАСАУ Орост хэзээ ч зэвсэг, сум нийлүүлж байгаагүй, цаашид ч нийлүүлэхээр төлөвлөөгүй хэмээн тус улсын төрийн төв хэвлэл алба KCNA мэдэгдэв.
Уг мэдэгдэлд ” АНУ болон бусад дайсагнагч хүчнийхэн НҮБ-ын аюулгүй байдлын зөвлөлийн тогтоолыг зөрчин БНАСАУ болон ОХУ-ын хооронд зэвсгийн наймаа явагдсан тухай цуурхал тараасан. Бид ОХУ-д урьд өмнө хэзээ ч зэвсэг, сум нийлүүлж байгаагүй бөгөөд хойшид ч экспортлохоор төлөвлөөгүй” гэжээ.
АНУ-ын Төрийн департаментын хэвлэлийн төлөөлөгчийн орлогч Ведант Пател энэ сарын эхээр “ОХУ-ын арми Украины нутаг дэвсгэрт ашиглах зорилгоор Умард Солонгосоос олон сая пуужин, их бууны сум худалдаж авах хэлэлцээр хийж байна” хэмээн мэдэгдсэн юм.
Цагаан ордны үндэсний аюулгүй байдлын төлөөлөгч Жон Кирби үүнийг “боломжтой худалдан авалт” гэж нэрлээд, худалдан авалт дууссан ч эдгээр зэвсгийг Украины нутаг дэвсгэрт ашиглаж байгаа гэсэн нотолгоо одоогоор үгүй гэж тодотгож байв.
БНАСАУ шинэ мэдэгдэлдээ АНУ-ыг “амаа хамхиж”, улс орны нэр хүндийг гутаах зорилготой энэ мэт цуурхал тараахаа зогсоохыг сануулжээ.
