Японы эм үйлдвэрлэгч “Eisai” компани болон АНУ-ын “Biogen” фирмийн хамтран гарган авч буй альцгеймерийн эм өвчний шинж тэмдгийн явцыг сааруулахад үр дүнтэй байгааг эмнэлзүйн туршилтаар тогтоожээ.
“Леканемаб” хэмээх шинэ эм нь өвчний шалтгаан гэж тооцогддог амилоид бета хэмээх уургийн төрлийг арилгадаг. Энэ уураг нь тархины дотор хуримтлагдаж, мэдрэлийн эсийг устгадаг гэж “Eisai” мэдээлсэн байна.
Тус компани 2023 онд Япон, АНУ, Европт эмэндээ зөвшөөрөл авахаар зорьж байгаа бөгөөд АНУ-ын Хүнс, эмийн чанарын хяналтын газар /FDA/ уг эмийг яаралтай зөвшөөрөл олгох журмын дагуу судалж байгаа ажээ.
Холбогдох зөвшөөрлийг авсан тохиолдолд “леканемаб” нь Японд альцгеймерийн шалтгаантай тэмцэж, шинж тэмдгийнх нь явцыг сааруулдаг анхны эм болох юм. Одоогоор хэрэглэж буй эмнүүдийн хувьд зөвхөн шинж тэмдгүүдийг намдаадаг байна.
“Энэхүү эм нь өвчтөнүүдийг асарч буй хүмүүст учирдаг саад бэрхшээлийг бууруулах зэргээр нийгэмд нааштай нөлөө үзүүлнэ гэдэгт бид найдаж байна” гэж “Eisai” компанийн гүйцэтгэх захирал Найто Харүо Токио хотноо болсон хэвлэлийн бага хурлын үеэр мэдээлжээ.
Эмнэлзүйн туршилтын үеэр эм ой санамж муудах, шийдвэр гаргах чадвар сулрах зэрэг шинж тэмдгийн явцыг плацеботой харьцуулахад 27 хувиар сааруулсан гэж “Eisai” компанийн мэдэгдэлд дурдсан байна.
Энэхүү туршилтад Япон, АНУ, Европ, Хятадад альцгеймерийн эрт үеийн шинж тэмдэг илэрсэн 1800 орчим хүн оролцжээ. Эм уусан хүмүүсийн 12-17 хувьд тархины хаван үүсэх, цус алдах зэрэг гаж нөлөө илэрсэн бол дийлэнхэд нь шинж тэмдэг илрээгүй, эсвэл түр зуур илэрсэн байна.
АНУ-д төвтэй Альцгеймерийн холбоо ашгийн бус байгууллагын мэдээллээр, дэлхий даяар 55 сая хүн альцгеймер болон бусад сэтгэцийн олдмол эмгэгийн улмаас шаналж байна.
Өнгөрсөн 12 дугаар сард Японы Эрүүл мэндийн яам “Eisai”, “Biogen” компанийн хамтран гарган авсан альцгеймерийн өөр эм болох “адуканумаб”-д зөвшөөрөл олгохоос татгалзсан юм.
